وزير الباصات

كثير منا طلع بباص هون بالاردن لو على الجامعه او لعند صاحبه او لاي مكان يعني نسبه ضئيله اللي ما طلعت بباص بحياتها
طبعا انا ما عرفت الباص الا لما جيت الاردن من عادتي صرت عايش بالباصات بالنسبه الي لانو تنقلي كثير و لكن من اكثر الباصات اللي بطلع فيها هي باصات السلط - عمان طبعا الشي اللي بميز الباصات عنا هون هو " الكنترول " و اللي يعتبر مثل وزير الداخليه داخل باصه
مواقف كثيره بتصير معي بشكل شبه يومي مع الكنتروليه و مثل العاده الغلط بكون عليه لكن شو بدكو تعملو يعني اكبر غلط تحط راسك براس واحد متخلف مثلهم المهم هداك اليوم كنت مستعجل و بدي اطلع للسلط و شكله الوضع ما كان موفي معهم و مو راضيين يطلعو للسلط و بطلعوا الركاب بس لصويلح طبعا رضينا باول باص انو ما يطلعنا و مر الثاني نفس الحاله و لكن لما مر ثالث باص و ما رضي يطلع للسلط انا زي ما تحكو سكرت معي المهم رميتلي كلمه على الماشي على الباص و الكنترول فاخينا الكنترول سمعني و ما عجبه الموضوع راح موقف الباص و بحكيلي عيدها انا من عصبيتي عدتها و بصوت عالي و طبعا كبداية كل طوشه كل واحد ببدا يعطي مين هو و شو ممكن يعمل و قبل ما نبدا ببعض مرت دورية شرطه و تفاهمو معنا و راح الكنترول بحال سبيله بعد ما خليته يحمل كل اللي واقفين للسلط و انا ما ركبت خوفا على حياتي ^_^ بتعرفوش شو ممكن يعمل بالباص بس يومها اكلت مية مسبه منو بس طلع و انا تاخرت على المحاضره او بمعنى راحت علي لكن مش هاد موضوعي

---------------------------------------

اليوم و انا راكب بالباص سمعت الكنترول بحكي الكلمه اللي بتبين انو احنا بالنسبه الو مش بني ادمين و هي لما حكى للسايق بدك ثلاث رووس طبعا انا مش عارف شو بدي احكي يعني صرنا بالنسبه الو بننحسب على الراس و اصبحنا مثل اللي تحت تحكم الكنتول شو ما حكى فهو شي مقدس بما انه بارضه = ( الباص ) صرت احس انو الكنترول مثل وزير و نحنا الشعب لا و المشكله انو هو ممكن يكون خطه السلط عمان لكن لما يحمل بحمل من السلط للجامعه الاردنيه و من هناك بحمل حموله تانيه كل هاد لانو الكنترول امر بهاد الشي و نحنا علينا نرضخ للامر الواقع طيب شو السبب اللي بخلي الكنترول يصير وزير علينا نفسي اعرف او انه بصير راعي غنم و احنا الخرفان لانو صرنا ننحسب بالراس و طبعا يا حبيبي اذا وحده حلوه بدها تركب بالباص بصير الكنترول صاحب نخوه و بركبها على راسه او بنزل كل اللي قاعدين بالباص عشان تركب و بصير يستقصد يركبها قدام جهته عشان يقعد طول الطريق يتطلع فيها و يا ويلها اذا بس نظرتله خلص هيك بتصير البنت مغرمه فيه و بدها تتعرف عليه و هو بكون مو مبين من وجهه شي قد ما فيه غرز خياطه و بكون مزبطلي الشعرات بطريقه يعني نفسي اعرف شو بعمل فيها طبعا لو جينا نحسب راتب الكنترول ممكن يطلع مقارب لراتب وزير يعني اذا بعضكم ما بعرف الكنترول باخد يوميا ما يقارب ال 16 - 22 دينار حسب الخط اللي شغال عليه

-----------------------------------------------

انا نفسي انزل على بلد مثل بريطانيا و اشوف لو حطو كنترول هناك على باصاتهم الطابقين هاي الباصات الحمر كيف حيكون شكله هل حيكون متل اللي عنا ولا حيكون واحد انظف من صاحب الباص اللي عنا طبعا انا بتوقع انو لو بدهم يشغلوا كنتروليه على الباصات حيصيروا يطلبوا من عنا كنترول بخبره 5 سنوات و لو بدو واحد محترف راح يضيف كنترول بخبره 5 سنوات مع سنتين على خط الزرقاء او الوحدات او السلط عشان يعني اذا اجى واحد بريطاني بدو هيك ينصب عليه بفرنك يعرف كيف يتدبره

----------------------------------

لو بدي اذكر الامور اللي بتصير معي يوميا بالباصات كان ما بخلص اللي بكتبه لكن انا صراحة راح اطالب بانه يعملوا تمثال يسموه الكنترول المجهول اقتداءا بالجندي المجهول لانه الكنتروليه صاروا من شخصيات البلد اللي ما بنقدر نستغني عنهم لدورهم الفعال بقيادة البلد الى التطور ان شاء الله
و تحية احترام لنشامى الباصات و الدمافعين عنه
و لكل الرؤوس اللي تطلع معهم

الله يعطيك العافيه اسلام
اشي من الاخر فعلا هالباصات بنقضي فيها نص حياتنا
وزي حكومه وشعب والكنترول بدو يلم روس فيها هههههه

مشكور يا كبير

طبعا عشان ما انسى المقاله كتبت
بتاريخ 8-9-2009
بقلمي انا

هو بالحقيقه بيصير هيك .... الله بيعينا شو بدنا نعمل

مشكوررر بجد اسلوبك روعه .... بس مش عارفه ليش حاطط الكنتروليه اعدائك؟؟؟

و الله يا شادن الكنتروليه اعداء ما يقار 82% من الشعب الاردني
مو بس عدائي انا
و منوره المهم تعجبك المقاله و خلينا نشوف ابداعك انتي

روعه اسلام مقالتك كتييير حلوة وفعلا في اشاياء بنعاني منه
بس شو بدنا نعمل بكون نفسي اضرب الكنترول كف وزير الباصات Icon_biggrin

بس ما باليد حيله شي بعصب الواحد
شكرا مومني
جد حلوة كتير ا

ههههههههههههههههه
اسلام بالله صورة الباص هاي مش نفسها الي بمجمع الزرقا الجديد
على خط الرصيفة ماركا؟؟؟؟؟؟؟؟

منوره هنوو
بس كلو ولا تضربي الكنترول مش ناقصنا نفقدك
و روقي ما في شي مستاهل بالاخر حتتعودي

هلا خالد و الله انا ما بدري اذا بموقف الرصيفه
بس هاي بالموقف اللي بكون على الطرف عند باصات رغدان الزرقا اول ما تدخل المجمع
على ايدك اليسار بكونو ورا بعض
اهل الزرقاء ادرى بشعابها
و انا من عجلون ما عنا شعاب

almomani88 كتب:: هلا خالد و الله انا ما بدري اذا بموقف الرصيفه
بس هاي بالموقف اللي بكون على الطرف عند باصات رغدان الزرقا اول ما تدخل المجمع
على ايدك اليسار بكونو ورا بعض
اهل الزرقاء ادرى بشعابها
و انا من عجلون ما عنا شعاب

هي نفسها لاني الباص نفسه شايفه مميز والمبنى الي عجنب الباص بيجي بالمجمع الجديد

اها يا خالد بحكيلك اهل الزرقا ادرى بشعابها

ههههههههههههههههههههههه

اسلوب رائع ، و مقاله اروووع

يسلمو

وزير الباصات

وزير الباصات :: تعاليق

وزير الباصات